Apni Palko'n Pay Jami Gard Ka Hasil Maangay

Apni Palko'n Pay Jami Gard Ka Hasil Maangay,
Wo Musaafir Hoo'n Jo Har Morr Pay Manzil Maangay.


Meri Wusa'at Ki Talab Nay Mujhay Mahdood Kiyaa,
Mai'n Wo Darya Hoon Jo Maujoo'n Say Bhi Saahil Maangay.

Khuaahish-E-Wasl Ko Sau Rang Kay Maf'hoom Diye,
Baat Aasaa'n Thi Magar Lafz Tou Mushkil Maangay.

Sach Ka Munkir Hua Arzaani-E-Khoo'n Ka Mausam,
Khaak-E-Maqtal Se Gawaahi Mera Qatil Maangay.

Dil Ki Zidd Par Na Khafaa Ho Meray Aflaak-Nasheen,
Dil Tou Paani Say Bhi Aks-E-Mah-E-Kamil Maangay.

Saans Meri Thi Magar Us Say Talab Ki "Mohsin",
Jaisay Khairaat, Sakhi Say Koi Saa'il Maangay.

~Mohsin Naqvi