Kabhi Raqs-E-Shaam-E-Bahaar Mei'n Usay Dekhtay

Kabhi Raqs-E-Shaam-E-Bahaar Mei'n Usay Dekhtay,

Kabhi Khuaahisho'n Kay Ghubaar Mei'n Usay Dekhtay.

Magar Aik Najm-E-Sahar-Numa Kahee'n Jaagta,

Teray Hijr Ki Shab-E-Taar Mei'n Usay Dekhtay.

Wo Tha Aik Aks-E-Gureez Paa, So Nahi Ruka,

Katti Umr Dast-E-Diyaar Mei'n Usay Dekhtay.

Wo Jo Bazm Mei'n Raha Bay-Khabar, Koi Or Tha,

Shab-E-Wasl Meray Kinaar Mei'n Usay Dekhtay.

Jo Azal Ki Loh Pay Naqsh Tha, Wohi Aks Tha,

Kabhi Ap Qarya-E-Daar Mei'n Usay Dekhtay.

Wo Jo Kainat Ka Noor Tha, Nahi Door Tha,

Magar Apnay Qurb-O-Jawaar Mei'n Usay Dekhtay.

Yahi Ab Jo Hai Yaha'n Naghma-Khuaa'n, Yahi Khush Bayaa'n,

Kisi Sham Koo-E-Nigaar Mei'n Usay Dekhtay.

~Amjad Islam Amjad