Jaun Yaaron Kay Yaar Thay Ham Tou

Aap Apna Ghubaar Thay Ham Tou,

Yaad Thay Yaad-Gaar Thay Ham Tou.

Pardagi! Ham Say Kiun Rakha Parda,

Teray Hi Parda-Daar Thay Ham Tou.

Waqt Ki Dhoop Mein Tumhaaray Liye,

Shajar-E-Saaya-Daar Thay Ham Tou.

Urtay Jaatay Hain Dhool Kay Maanind,

Aandhiyon Par Sawaar Thay Ham Tou.

Ham Nay Kiun Khud Pe Ei'tibaar Kiya,

Sakht Bay-Ei'tibaar Thay Ham Tou.

Sharm Hai Apni Baar-Baari Ki,

Bay-Sabab Baar Baar Thay Ham Tou.

Kiun Hamein Kar Diya Gaya Majboor,

Khud Hi Bay-Ikhtiyaar Thay Ham Tou.

Tum Nay Kesay Bhulaa Diya Ham Ko,

Tum Say Hi Musta'aar Thay Ham Tou.

Khush Na Aaya Hamein Jiye Jaana,

Lamhay Lamhay Pe Baar Thay Ham Tou.

Sheh Bhi Letay Hamaaray Ta'ano'n Ko,

Jaan-E-Man Jaa'n-Nisaar Thay Ham Tou.

Khud Ko Doraan-E-Haal Mein Apnay,

Bay-Tarah Naa-Gawaar Thay Ham Tou.

Tum Nay Ham Ko Bhi Kar Dia Bar-Baad,

Nadir-E-Roz-Gaar Thay Ham Tou.

Ham Ko Yaaron Nay Yaad Bhi Na Rakha,

Jaun Yaaron Kay Yaar Thay Ham Tou.

~Jaun Elia