Gham Nahi Is Ka Jo Shohrat Ho Gayi

Gham Nahi Is Ka Jo Shohrat Ho Gayi,

Ho Gayi Ab Tou Mahabbat Ho Gayi.

Ab Kahaa'n Aglay Say Wo Raaz-O-Niyaaz,

Mil Gaye Saahab Salaamat Ho Gayi.

Haaye Kia Dil-Kash Hai Us Ki Chashm-E-Mast,

Aankh Miltay Hi Mahabbat Ho Gayi.

Chaudhwaa'n Saal Un Ko Hai Naam-E-Khuda,

Umr Aafat Thi Qayaamat Ho Gayi.

Naaz Say Us Nay Jo Dekha Sheikh Ko,

Un Ki Dee'n-Daari Hi Rukhsat Ho Gayi.

~Akbar Allahabadi