Asar-E-Manzil-E-Maqsood Nahi Dunya Mein

Aayina Seena-E-Saahib Nazaraa'n Hai Kay Jo Tha,

Chehra-E-Shaahid-E-Maqsood Ayaa'n Hai Kay Jo Tha.

Ishq-E-Gul Mein Wohi Bulbul Ka Fughaa'n Hai Kay Jo Tha,

Partaw-E-Mah Say Wohi Haal Kataa'n Hai Kay Jo Tha.

Aalam-E-Husn Khudaadaad Butaa'n Hai Kay Jo Tha,

Naaz-O-Andaaz Balaa-E-Dil-O-Jaa'n Hai Kay Jo Tha.

Raah Mein Teri Shab-O-Roz Basar Karta Hoon,

Wohi Mail Aur Wohi Sang-E-Nishaa'n Hai Kay Jo Tha.

Roz Kartay Hain Shab-E-Hijr Ko Baidaari Mein,

Apni Aankhon Mein Subak Khuaab, Giraa'n Hai Kay Jo Tha.

Aik Aalam Mein Ho Har Chand Maseeha Mash'hoor,

Naam-E-Beemaar Say Tum Ko Khafaqaa'n Hai Kay Jo Tha.

Daulat-E-Ishq Ka Gunjeena Wohi Seena Hai,

Daagh-E-Dil, Zakhm-E-Jigar Mehr-O-Nishaa'n Hai Kay Jo Tha.

Naaaz-O-Andaaz-O-Ada Say Tumhein Sharm Aanay Lagi,

Aarzi Husn Ka Aalam Wo Kahaa'n Hai Kay Jo Tha.

Jaa'n Ki Taskee'n Kay Liye Haalat-E-Dil Kehtay Hain,

Bay-Yaqeeni Ka Teri Ham Ko Gumaa'n Hai Kay Jo Tha.

Asar-E-Manzil-E-Maqsood Nahi Dunya Mein,

Raah Mein Qaafla-E-Raig Rawaa'n Hai Kay Jo Tha.

Dahan Us Roo-E-Kitaabi Mein Hai, Par Naa-Paida,

Ism-E-A'azam Wohi Qur'aa'n Mein Nihaa'n Hai Kay Jo Tha.

Ka'ba-E-Madd-E-Nazar Qibla-Numa Hai Taa-Haal,

Koo-E-Janaa'n Ki Taraf Dil Nigaraa'n Hai Kay Jo Tha.

Koh-O-Sahra-O-Gulistaa'n Mein Phira Karta Hai,

Mutalaashi Wo Teraa Aab-E-Rawaa'n Hai Kay Jo Tha.

Sozish-E-Dil Say Tasalsul Hai Wohi Aaho'n Ka,

Ood Kay Jalnay Say Mujmir Mein Dhuwaa'n Hai Kay Jo Tha.

Raat Katt Jaati Hai Baatein Wohi Suntay Suntay,

Sham'a-E-Mahfil Sanam-E-Charb Zubaa'n Hai Kay Jo Tha.

Paa-E-Khum Masto'n Ki Ho Haq Ka Jo Aalam Hai So Hai,

Sar-E-Minbar Wohi Waa'iz Ka Bayaa'n Hai, Hai Kay Jo Tha.

Kon Say Din Nayi Qabrein Nahi Is Mein Bantee'n,

Ye Kharaaba Wohi Ibrat Ka Makaa'n Hai Kay Jo Tha.

Bay Khabar Shoq Say Meray Nahee'n Wo Noor-E-Nigaah,

Qaasid-E-Ashk Shab-O-Roz Rawaa'n Hai Hai Kay Jo Tha.

Lailatul Qadr Kinaaya Na Shab-E-Wasl Say Ho,

Is Ka Afsaana Mayaan-E-Ramazaa'n Hai Kay Jo Tha

Deen-O-Dunya Ka Talab-Gaar Hanooz AATISH Hai,

Ye Gadaa Saa'il-E-Naqd-E-Do Jahaa'n Hai Kay Jo Tha.

~Haidar Ali Aatish