Aadmi, Aadmi Say Milta Hai

Aadmi, Aadmi Say Milta Hai,

Dil Magar Kamm Kisi Say Milta Hai.

Bhool Jata Hoon Mein Sitan Uskay,

Wo Kuch Is Saadagi Say Milta Hai.

Mil Kay Bhi Jo Kabhi Nahi Milta,

Toot Kar Dil Usi Say Milta Hai.

Aaj Kia Baat Hai Kay Phoolon Ka,

Rang Teri Hansi Say Milta Hai?

Silsila Fitna-E-Qayaamat Ka,

Teri Khush-Qaamati Say Milta Hai.

Kaarobaar-E-Jahaan Sanwartay Hain,

Hosh Jab Bay-Khudi Say Milta Hai.

Rooh Ko Bhi Mazaa Mahabbat Ka,

Dil Ki Ham-Saayagi Say Milta Hai.

~Jigar Moradabadi