Dhoondo Gay Agar Mulkon Mulkon Milnay Kay Nahi Naayaab Hain Ham

Dhoondo Gay Agar Mulkon Mulkon Milnay Kay Nahi Naayaab Hain Ham,

Tabeer Hai Jiski Hasrat-O-Gum,
Ay Ham-Nafaso Wo Khuaab Hain Ham.

Ay Dard Bataa Kuch Tu Hi Bataa!
Ab Tak Ye Mu'amma Hal Na Hua,

Ham Mein Hai Dil-E-Bay-Taab Nihaa'n Ya Aap Dil-E-Bay-Taab Hain Ham.

Main Hairat-O-Hasrat Ka Maara, Khaamosh Kharra Hoon Saahil Par,

Daryaa-E-Mahabbat Kehta Hai, Aa Kuch Bhi Nahi Paa-Yaab Hain Ham.

Laakhon Hi Musaafir Chaltay Hain Manzil Pe Pohnchtay Hain Do Aik,

Ay Ahl-E-Zamaana Qadr Karo Nayaab Na Hon, Kamyaab Hain Ham.

Murghaan-E-Qafas Ko Pholon Ne, Ay "Shaad"! Ye Kehla Behja Hai,

Aa Jaao Jo Tumko Aana Ho Aisy Me, Abhi Shadaab Hain Ham.

~Shad Azimabadi