Aasmaano'n Par Nazar Kar Anjum-O-Mahtaab Daikh

Aasmaano'n Par Nazar Kar Anjum-O-Mahtaab Daikh,

Subh Ki Bunyaad Rakhni Hai Tou Pehlay Khuaab Daikh.

Ham Bhi Sochen Gay Duaa-E-Bay-Asar Kay Baab Mein,

Ek Nazar Tu Bhi Tazaad-E-Minbar-O-Mihraab Daikh.

Dosh Par Tar-Kash Para Rehnay Day Pehlay Dil Sanbhaal,

Dil Sanbhal Jaaye Tou Soo-E-Seena-E-Ahbaab Daikh.

Moja-E-Sar-Kash Kinaaro'n Say Chhalak Jaaye Tou Phir,

Kaisi Kaisi Bastiyaa'n Aati Hain Zair-E-Aab Daikh.

Boond Mein Saara Samandar, Aankh Mein Kul Kaainaat,

Aik Musht-E-Khaak Mein Sooraj Ki Aab-O-Taab Daikh.

Kuch Qalandar Mashrabo'n Say Raah-O-Rasm-E-Ishq Seekh,

Kuch Ham Aashufta-Mizaajo'n Kay Adab Aadaab Daikh.

Shab Ko Khatt-E-Noor Mein Likhi Hui Tabeer Parh,

Subh Tak Deewaar-E-Aayinda Mein Khiltay Baab Daikh.

Iftikhar Arif Kay Tund-O-Taiz Lehjay Par Na Jaa,

Iftikhar Arif Ki Aankho'n Mein Ulajhtay Khuaab Daikh.

~Iftikhar Arif