Koi Mujh Ko Mera Bhar-Poor Saraapa Laa Day

Koi Mujh Ko Mera Bhar-Poor Saraapa Laa Day,

Meray Baazoo, Meri Aankhein, Mera Chehra Laa Day.

Aisa Darya Jo Kisi Or Samandar Mein Giray,

Is Say Behtar Hai Kay Mujh Ko Mera Sehraa Laa Day.

Kuch Nahi Chaahiye Tujh Say Ay Meri Umr-E-Rawaa'n,

Mera Bachpan, Meray Jugnoo, Meri Guryaa Laa Day.

Jis Ki Aankhein Mujhay Andar Se Bhi Parh Sakti Hon,

Koi Chehra Tou Mere Shehr Mein Aisa Laa Day.

Kishti-E-Jaa'n Tou Bhanwar Mein Hai Kayi Barso'n Say,

Ay Khudaa Ab Tu Dubou Day Ya Kinaara Laa Day.

~Noshi Gilani